Racconti d'autore.

Salvatore Barone è nato nel 1951 nel quartiere Porto di Napoli, uno dei tre che, con Pendino e Mercato, egli ama definire "La Città del Mare Perduto" perché il mare, da questi vicoli popolari e antichi, non si vede più, occluso da una barriera portuale inutile e da uno sbarramento di grattacieli che offendono l'anima stessa di una civiltà che sul mare si è fondata e che il mare adesso ha perduto. Salvatore su questi temi scrive articoli, racconti, "deliri", percorsi in rima dialettale che descrivono l'antico e il moderno della sua "Città di Mare". In questo spazio di Napoletanità, Salvatore propone alcuni suoi percorsi, estratti dal libro "'A Scola d''o Pendino" (in corso di pubblicazione), testo che raccoglie osservazioni, consigli, atmosfere e discussioni belle e infinite con altri abitanti della Città di Mare: lo storico Luigi De Falco, l'amico Giacomo, lo stesso De Fabio. D'altro - di premi, di concorsi, di esibizioni, di "facimmo a chi è cchiù bello" - questo amante di Napoli non si interessa, in questo campo, e poco gli importa di "futtimienti" o scopiazzature che, comunque, non possono che parlare della sua città. E questo è l'importante.

Ha scelto per voi navigatori queste composizioni:

Suonno
'A Madonna d''o Carmine


Suonno sunnato na notte...

Suonno sunnato na notte d'estate annanz' 'a cantina aret' 'a Marina
Ma che sta succerenno a 'sti quartieri antichi ca stanno scumparenno a vicolo pe' vico...? Da 'o Llargo d''o Castiello anfin' 'o Lavenaro, da 'a Piazza 'e Masaniello fin' â Stella Polare, ca a Napule so' zone ca 'a sempe ce sta 'o Puorto, mo' sta pupulazione sta avenno n'atu tuorto da 'e grandi trafficanti ca 'int' 'a ogni occasione, 'nzieme a 'e puliticanti fanno speculazione: primma 'o Risanamento, po', doppo, 'o terremoto, mo' cu 'o Rifacimento... Chisti, nu piezzo â vota, s'accattano 'utte 'e strade, quartieri sani sani, e 'a gente ca c'è nata 'a mannano luntano, dint' 'e pperiferie, pe' miezo a cierti posti ca è na malincunia, e ca so' fatti apposta pe' ce fa' sta quieti, pe' nun ce fa parlà, e lloro a preta a preta se fottono 'a città. Ma nunn v' 'e rricurdate 'e zzone scumparute? E chelle già sfasciate? Ma chi se l'è 'nghiuttute? 'O Ponte â Matalena, addò sulo cu 'a mano San Gennaro trattene 'o ffuoco d''o Vulcano... E 'a foce d''o Sebbeto, chi 'a fatto scumparì? E 'o Buvero Loreto a chi ha fatto arricchì? E 'a fora e dinto 'e Mmura, 'ntuorno â Maronna Scura, nunn'è na sgurbiatura, nu scuorno d''a natura? E 'e tutta 'a Cunciaria? E 'e vichi d''e pellari? E 'a Zabatteria? E 'e strade d''e Casciari? E 'e Llogge 'e ogni Paese d''o Molo Pisacane? Tuscani, Genovesi, 'a Loggia d''e Pisani... E 'a Rifece addò sta? Ma quanta putechelle c'hanno lassato llà, attuorno â chiazzulella addò sta 'o Crucifisso? A pparte quacche voce, mo' ce sta sultant' isso ca allucca 'a copp' 'a Croce! E 'a Borza ô lato 'e vascio? Lanzieri, Scuppettieri, puteche 'e Masterascia, chelle d''e Chiavettieri... E 'a zona d''o Mandracchio cu' Puortosalvo attuorno? Chillo nunn'è nu nguacchio? Chillo nunn'è nu scuorno? "Ma crire overamente ca 'a gente se ne 'mporta 'e tutti 'sti lamienti? Ma chi se ne strafotte! Lle daje nu poco 'e sordi, doje stanze 'a n'ata parte, e 'o popolo se scorda d''a tradizione, 'e ll'arte, 'e tutte sti strunzate, d''e cose d'aieri, d''e strade addò si' nato, d''e viecchi mestieri... Iammo, lassate sta', nun ce scassate 'o cazzo! Ccà tenimmo che fà: avimmo aizà 'e palazzi! Llà, chillo 'e vinti piani, ce metto ll'Isveimer; ccà, studi monovani cu 'e fax e 'e computer. Ccà, ncopp' a 'sta terrazza, tutta pubblicità; llà, ô posto 'e chella piazza, garace in quantità!" E accussì a uno a uno sàglieno 'e grattacieli ca portano fortuna sulo a chi sta già 'ncielo, mentre 'a 'int''a sti quartieri 'a gente se ne va, e torna a se fa nera 'a storia 'e sta città. Guardate via Marina: nun ce stanno puteche, manco nu magazzino, tutti palazzi ciechi, uffici, banche scure, nicchie 'e tutt''e mmanere, ca 'a sera fa paura peggio 'e nu cimitero, fenestre 'e vitro niro, nemmeno nu balcone, e addreto nun ce vire neanche na perzona... E manco mmiez' ê strate truove nu poco 'e gente, a parte ll'impiegati ca nun so' residenti. E chesta è na città? Chella ca mo' se dice "una comunità"? Chesto ce fa felice? Città senza culore e strille d''e ccriature, città senza chiù addore 'e mare, 'e gente, 'e sciuri... E ll'aria? E' aria nera d''e tubb' 'e scappamento ca d''a matina 'a sera so' ll'unico strumento ca, invece 'e na cantata, fanno cuncierti 'e fummo pe' mmiez'a chesti strate, sotto a nu cielo 'e chiummo! Vide chella schifezza abbascio Puceriale, chiammata, con fierezza, "Centro Direzionale"! Ma che è, nu posto bello, fatto p''a gente umana? Ma che so' case, chelle? E pe' 'e napulitani...? Ma ll'ate visto bbuono? Comme se fa a penzà ca na pupulazione ce po' campà, 'into llà? Perciò, popolo bello, nun ce facimmo fa'! Fermalo, stu maciello, turnammo a raggiunà! Si, iammo bello, ja', viecchi napulitani, guagliuni 'e ogni età, gente cu 'a capa sana d''o largo 'e ll'Ecce Homo, d''o vico Banchi Nuovi, d''e strade attuorno 'o Duomo, d''a piazza 'e Portanova, e gente d''o Pendino, Furcella, Tribbunale, Largo San Marcellino, San Biagio d''e Librari, e orefici, argentieri, vui artigiani antichi ca site artisti overo, gente 'e dint'a sti vichi, e vviecchi putecari, scugnizz' 'e miezo 'a via, gente d''o Lavenaro, 'e 'int''a Zabatteria, e vuje prufessionisti 'e tutto 'o Rettifilo, venite annanze 'a lista, scennite in primma fila... Femmene d''o Mercato, uommeni 'e sant'Eligio... No, no, nun l'accettate stu munno friddo e grigio, ca appena chist'abbuso fernesce â parte 'e ccà trovano n'ata scusa p''o riesto d''a città, e d''a matina â sera ce levano 'a 'int''e mmane 'o riesto d''e quartieri ca songo ancora sani, addò se po' campà cu nu pizzico 'e core, nu poco 'e dignità e na 'ntecchia 'e calore... Ascite 'a 'int''e palazzi, venite for' ê vasci, scennite d'ê terrazze, venite tutti abbascio, mettimmo 'e bancarelle, stennimmo 'e panni ô sole, 'nciurammo 'e balcuncielli, parlammo cu 'e parole, e po' appicciammo 'e banche, e nun l'ausammo chiù, levammece 'a 'int' ê cianche chestata schiavitù, e tutto 'o riesto appriesso, 'e fax, 'e computer, tanto se campa 'o stesso si nun ce sta internet! Turnammo dint''e vichi a sta' faccia cu facccia, a ce trattà da amichi, a ce scagnà n'abbraccio! Turnammo a ce guardà dui uocchi 'int''a dui uocchi, senza duvé passà pe' dinto a nu scatuorchio, fosse 'a televisione, nu cellulare o che, e cu 'a suddisfazione, 'o sfizio 'e nu cafè pigliato cu n'amico, dicenno ddoje parole, passianno dint''e vichi, aizanno 'a capa ô sole, cantanno alleramente na canzuncella antica pe' fa' nu cumplimento a una ca ce 'ntrica... Si, jammo bello, ja'! Facimmelo veré ca stammo ancora ccà, ca ancora hanno a sapè chi so' 'e napulitani ca teneno memoria, chi so' 'e napulitani ca, comme dice 'a storia, quanno vene 'o mumento ca ce sta a se 'ncazzà 'o ffanno overamente, e so' cazzi 'a cacà!

Legenda:
- Llargo d''o Castiello = piazza Municipio
- Stella Polare: zona tra via Marina, Ponte d. Maddalena e il quartiere Mercato
- Risanamento = sventramento e ricostruzione dei quartieri bassi di Napoli effettuato alla fine del secolo
- 'o Rifacimento... : ci si riferisce al piano di ricostruzione di via Marina
- 'O Ponte â Matalena, addò : su questo ponte vi è una statua settecentesca del patrono di Napoli che lo raffigura nell'atto di fermare l'eruzione del Vesuvio
- Sebbeto: Sebeto, leggendario fiume che forse attraversava la città
- Buvero Loreto: Borgo Loreto, demolito dopo l'ultima guerra mondiale
- 'e Mmura: zona con resti di murazione quattrocentesca
- Maronna Scura = Madonna del Carmine
- Cunciaria, pellari, Zabatteria, Casciari, Lanzieri, Scuppettieri, Masterascia, Chiavettieri...: zone e mestieri antichi
- 'e Llogge: Insediamenti di epoca medievale adiacenti il porto
- 'o Crucifisso: monumento ligneo simbolo della zona degli Orefici
- Mandracchio: antico porto detto di Arcina, nei pressi di piazza Borsa
- chiummo = piombo
- Puceriale = Poggioreale
- Ecce Homo, Banchi Nuovi, Duomo, Portanova, Furcella, Tribbunale, Largo San Marcellino, San Biagio dei Librari: zone e strade antiche di Napoli
- prufessionisti : il Rettifilo è sede di molti studi professionali e uffici
- sant'Eligio: convento e chiesa gotico-medievale nei pressi di piazza Mercato
- 'ntecchia = pizzico, pochino, un po'
- 'nciurammo = infioriamo
- scatuorchio = scatolo informe o anche tecnologico, non tradizionale
- a una ca ce 'ntrica = a una donna che ci interessa, ci piace


'A Madonna d''o Carmine

'A i' ccà, 'a Maronna 'o Carmine, pe' nui Mamma Schiavona,
'a madunnella bruna ca fuie purtata ccà
da 'e muonaci d'oriente pecché 'a parte 'e llà'
a gente è 'e n'ata razza e 'e n'ata religione.

'A chiesa
'A i' ccà, 'a Maronna bruna, sta chiesa brutta 'a fora,
ma ricca e bella 'a dinto, chiena 'e oggetti importanti,
marmi e porte pregiate, tombe d''e guvernanti,
nu pavimento a scacchi sul'isso nu tesoro,

e po' tant'ati cose: 'a statua 'e Corradino,
'a cappelluccia 'e Barbara, chelle 'e cierti famiglie,
e ll'organo cu 'o scudo cu 'a coppa 'a palma e 'o giglio,
e affrischi d''o Solimena, nu suffitto assai fino,

e ll'altare maggiore cu gemme assai preziose,
e 'e tre bassorilievi cu 'a Crucifissione,
'a Nascita 'e Gesù, e po' 'a Resurrezione,
e 'e ccapuzzelle 'e ll'angeli 'e n'artista famoso...

Ma a cosa 'e chesta chiesa ca te fa chiù 'mpressione,
'o ssanno tuttu quanti, è 'o Crucifisso 'e legno
ca sturzellanno 'a capa salvaie due anni 'e regno
'e Carlo l'Angioino, e po' pe' punizione

cu' n'ata palla 'e fierro ca fuie chiammata " 'a pazza"
tagliaie 'a capa a 'o frato 'e Alfonso d'Aragona,
ca quanno turnaie a Napule venette buono buono
a chiedere perdono pe' tutt''e guai d''a guerra...

'O campanaro
Ah! 'O campanaro 'e Nuvolo... Chillo cu' 'a guglia a pera
ca 'o vire 'a tutte parte 'a miezo a sta città,
e ca 'int''a festa 'e luglio, quanno 'o fanno appiccià
te fa appiccia 'int''o core tanto ca 'o ffuoco è overo...

'O chiostro
E affianco a 'o campanaro, 'o Chiostro maltrattato,
scassato, arruvvinato, jettato, scuncecato
'a chelli cape 'e mbrello ca hanno fatto 'a strunzata
'e fa' for''a Marina na specie d'autostrada...

'A porta
Nu chiostro accussì bello, gotico e medievale,
trattato na schifezza, jettato 'int''a munnezza...
E po' hanno fatto 'o stesso cu n'ati ddoie finezze:
'a Porta ca sta 'e lato, trattata tale e quale,

'E ttorre
e 'e ttorre aragonesi, mmiscate miezzo 'o fummo
'e mille e mille machine ca ogni dui mumenti
'e ffanno addivintà ato ca monumenti:
oggetti indifferenti 'e ntussecati 'e chiummo.

'A tomba 'e Masaniello
E' brutto, ma è accussi. E' chesta, 'a verità.
Pecché, se vere ancora 'o riesto d''o Castiello?
E 'e mmura d''o Sperone? E 'a tomba 'e Masaniello
ca si se guarda buono sta ancora 'a parte 'e ccà?

Attuorno a 'sta Maronna, addo' è passata 'a Storia,
hanno saputo fa' sultanto n'autostrada,
scassanno tutto cosa, scurdannese 'o passato
e 'o fatto ca 'o Mercato a nuie sta 'int''a memoria.

...


Webmaster:
Umberto de Fabio
udf@mclink.it